Vi har ankomt nye Fosnavåg konserthus, og utforskar området.
Inne i salen er det digert. Heile nitten radar med tjuesju sitjeplassar på kvar rad. Desse skal bli fylte i morgon då musikkelevane har sine siste førestillingar på turnèen, ytterst ute i havgapet. Det er LED-lys i trappene, og radnummera er opplyste.
Backstage er stort og lyst. Gangane er breie og veggane er heilt kvite. Ein kan gå tre personar i breidda, noko som er stor forskjell frå backstage-gangane som var ved Sjøborg i Ulsteinvik.
I jentegarderobene er det store speil med runde lys rundt, og veggane er kvite også her. På eit klestativ heng alle kostyma, medan på golvet ligg det baggar, sko og sminkevesker.
I gutegarderoba er det mørke veggar og detaljane er raude. Der er kjøleskap, kjøkkenkrok og gode sofagrupper.
– Borda er til og med mjuke, seier Benjamin Mpanza, medan han slepp telefonen ned for å vise oss.
Ole-Martin Iversen beskriv rommet som eit skikkeleg guterom. Gutane i garderoba er einige i at det einaste som manglar er ein prosjektor og to store høgtalarar, samt at ein kunne ha bytta ut biletet på veggen med dameplakatar. Ellers er dei fornøygde!
– Biletet på veggen er litt feminimt, men ellers er alt bra. Kjøleskapet er raudt og har fine linjer.
Tekst: Julie Sævik, Maren Solem Foto: Åge Andre Breivik