Pressemelding for MUSIKALEN 2016

Volda vgs med Elton John-musikal

Musikalen «Be Our Guest» vart avslutta spektakulært i 2015. No går elevane i gong med «Goodbye Yellow Brick Road». Foto: Eline Korsnes Sundal
Musikalen «Be Our Guest» vart avslutta spektakulært i 2015. No går elevane i gong med «Goodbye Yellow Brick Road». Foto: Eline Korsnes Sundal

Om under ein månad opnar sceneteppet for Musikalen 2016. Bak teppet står over 100 elevar klare. I løpet av tre dagar får nesten 2.000 tilskodarar med seg musikalen «Goodbye Yellow Brick Road» på Ørsta kulturhus.

Øvingane er allereie godt i gong med det som vert Volda vidaregåande skule sin tjuande musikal. Både musikk- og medieelevar er med på produksjonen som i år tek sikte på å fylle kulturhuset i Ørsta fire gonger. I tillegg er to framsyningar sette av for at ungdomsskuleelevar i distriktet skal få med seg musikalen.

– Dette er eit høgdepunkt for alle elevane som får vere med på det, seier Jan Terje Eidset. Han er avdelingsleiar for elevane og lærarane som er med på produksjonen, og også produsent for det heile.

Der fjorårets musikal tok turen gjennom alle dei tidlegare musikalane, er «Goodbye Yellow Brick Road» bygd på musikken til Elton John og tekstane til Bernie Taupin. Me er i England, der me vert kjende med John. Han siktar mot stjernestatus med bandet sitt. Historia hans blir fletta saman med musikarfaren si store sorg og den russiske dansarinna Nikita som prøver lukka i London etter ein foreldrelaus barndom i Russland.

– Kjærleik, dramatikk og uventa vendingar supplerer den fantastiske musikken, saman med dei visuelle effektane, seier produsent Eidset.

«Goodbye Yellow Brick Road» har premiere onsdag 17. februar. Deretter kjem to framsyningar torsdag, før det heile blir avslutta fredag 19. februar. Billettar får du kjøpt på Ørsta kulturhus sine nettsider.

– Musikken er det nok mange som kjenner til, men historia er ny, spesialskriven av musikklærar Gunnar Aurdal, regissert av Bente-Elin Johnsen, og spelt av nesten hundre lokale elevar, avsluttar Eidset.

For alle Elton John-tilhengarar vil dette vere ei strålande opplading til artisten sjølv kjem til Ålesund i juni!

P.S. Nettside og Facebook-side for årets musikal vert lansert komande veke.

Tekst: Åge André Breivik

Foto: Eline Korsnes Sundal

– Grensa mellom amatør og profesjonell er viska ut!

_DSC8037
Torsdag 26. februar fekk musikklinja storfint besøk av ordførar i Volda, Arild Iversen. Han kom på ordre frå formannskapet for å takke for ein fin musikal, og å overrekke ei gåve.

Hendinga starta med at musikklinja framførte «Somebody to love» med solist Anna Elise Klungre _DSC8007Sørdal. Det var ei god stemning i romet.

Arild Iversen er imponert over både framføringa og marknadsføringa for årets musikal.

– Grensa mellom amatør og profesjonell er viska ut, seier han. Han fortset med å seie at ei slik førestilling gjev heile skulen eit godt rykte.

Som takk fekk musikklinja eit gåvekort på 5000 kroner og ein blomebukett, medan rektor fekk ein krystallvase.

 

Tekst: Julie Sævik, Maren Solem, Dorthe Johanne Hovden
Foto: Eline Korsnes Sundal

 

– Eg kan tenke meg å vere med i musikal i framtida!

Johan Bjørkedal er tredjeklassing på musikklinja og er dermed ferdig med alle musikalane ved Volda vidaregåande for alltid. Dette året har han vore bassist i orkesteret.

Johan Bjørkedal var bassist i orkesteret under "Be Our Guest". Det vart hans siste musikal som elev på Volda vgs. Foto: Eline Korsnes Sundal
Johan Bjørkedal var bassist i orkesteret under «Be Our Guest». Det vart hans siste musikal som elev på Volda vgs. Foto: Eline Korsnes Sundal

– Det er rart å tenke på at eg ikkje får vere med på noko liknande prosjekt igjen, seier Johan.

Han legg til at det også er greitt å kome på jorda igjen etter prosjektet og få byrja på kvardagen igjen.

For Johan er det kanskje ikkje den siste musikalen han får vere med på i livet.

– Eg kan godt tenke meg å vere med på ein musikal i framtida. Det heile er veldig givande, men også veldig travelt, avsluttar bassisten Johan Bjørkedal.

TEKST: Amalie Haugland Bjørkedal og Camilla Venes

Ein strålande musikal

Årets musikal er over. Elevar og lærarar har brukt ferien til å slappe av og få tilbake energien. I gangane på nedrebygget ved Volda vgs har lydnivået senka seg.

 

Jan Terje poserer ved årets musikalplakat
Jan Terje poserer ved årets musikalplakat

 

-Det har vore ein strålande musikal, seier produsent og avdelingsleiar Jan Terje Eidset.  Han synest det har vore gøy å reise på turné og teste ut forskjellige scener.

 

Også orkesterdirigent Gunnar Sigve Aurdal er einig i at musikalen har mange positive  og gode sider.

-Sidan eg sto bak eit lerret, har eg ikkje fått sett heile framsyninga. Eg har i etterkant  fått sett nokon små snuttar av det som skjedde på scena, og både digitale kulissar og  det som skjer på scena ser bra ut.

 

 

 

Gunnar Sigve synest at det var bra at dei reiste på turné. Då fekk dei vise fram linjene på ein god måte, men samstundes så var det kanskje litt omfattande. Han synst at det kanskje kunne holdt med å reise til ein av plassane.

Sjølv om årets musikal enno ikkje er komen ut av tankane, så er planlegginga for neste år allereie påbegynt.

Gunnar Sigve poserar ved bestefaren sin gitar
Gunnar Sigve poserar ved bestefaren sin gitar

-Eg kunne ha sagt ingen kommentar, men det hadde vore å lyge, seier Gunnar Sigve.

Jan Terje er meir vågal.

– Vi toppar alltid fjorårets.

 

Tekst: Dorthe Johanne Hovden, Julie Sævik, Maren Solem
Foto: Eline Korsnes Sundal

– Eg er veldig glad for at eg har ein musikal igjen!

Foto: Eline Korsnes Sundal
Anna Holen Bjørdal i «What I did for Love» frå musikalen «A Chorus Line». Foto: Eline Korsnes Sundal

No er det snart to veker sidan musikalen stengte dørene. Elevane ved musikklinja synast det både er rart, trist men samtidig godt at ein er ferdig for i år.

Anna Holen Bjørdal er glad for at ho får bli med på ein musikal til før ho er ferdig på Volda vgs. Foto: Eline Korsnes Sundal
Anna Holen Bjørdal er glad for at ho får bli med på ein musikal til før ho er ferdig på Volda vgs. Foto: Eline Korsnes Sundal

Anna Holen Bjørdal som går i 2.klasse på musikklinja har svart på nokon spørsmål ei stund etter musikalen.

– Eg er veldig glad eg har ein musikal igjen, for eg vil ikkje gi meg enda, seier Anna.

Ho trur også at den neste musikalen blir veldig spesiell, sidan det er siste musikalen hennar.

– Men eg gler meg mykje!

Anna synast det er merkelig å gå frå musikal til vanleg skule igjen.

– Det blir på ein måte litt tomrom, seier ho. Ho legg til at det er trist, men at det er veldig godt å kunne sjå tilbake på ein flott og vellukka musikal.

Ho forklarar at som fyrsteklassing hadde ho veldig store forventingar, sida det var den første musikalen hennar. Anna var nervøs i forkant, men i år derimot, kunne ho ikkje gjere anna enn å glede seg.

– Eg var nok litt nervøs med tanke på at vi skulle på turné til Ulsteinvik og Fosnavåg, men det gjekk heilt fint, avsluttar ho.

TEKST: Amalie Haugland Bjørkedal og Camilla Venes

Orden i eit kaos av myggar og mikrofonar

Myggane som solistar og skodespelarar brukte under musikalen låg nummererte bak scena. Foto:
Myggane som solistar og skodespelarar brukte under musikalen låg nummererte bak scena. Foto: Stephanie Dimmen

Når 96 lydkanalar skal styrast gjennom ein musikal er det viktig at logistikken fungerer. Nummererte mikrofonar klar bak scena gjer at skodespelarane finn det dei treng.

Fyrsteklassing Jeki Villanueva og andreklassing Eirik Trovåg Bjørneset har brukt heilt forskjellige typar mikrofonar gjennom musikalen.

Eirik har brukt mygg under årets musikal og er svært fornøgd med det.

Eirik Trovåg Bjørneset imponerer i sine solonummer i "Be Our Guest". Foto: Åge André Breivik
Eirik Trovåg Bjørneset brukte trådlaus mygg på sine solonummer, sidan koreografien ikkje tillet at han held mikrofonen i handa. Foto: Åge André Breivik

– Eg likar best mygg fordi då har eg frie hender. Men myggen er veldig stram og vond å ha på. Ein må stille veldig nøyaktig på den slik at det blir bra lyd, forklarer Eirik.

I sine solonummer på «Thriller» og «Come Together» må han bruke mygg fordi dansinga ikkje tillet han å halde ein mikrofon.

I musikalen var det heile 96 lydkanalar som var i bruk. 30 av desse var trådlause myggar og tre var trådlause handhaldne mikrofonar. 40 av mikrofonane er kormikrofonar og resten av mikrofonane vart brukt til bandet.

Jeki Villanueva brukte vanleg handheldt kormikrofon og er nøgd med det.

Kormikrofonane låg klare på eit stativ bak scena. Foto:
Kormikrofonane låg klare på eit stativ bak scena. Foto: Stephanie Dimmen

– Det kling veldig fint med vanleg mikrofon. Ein fordel er at eg også slepp å stresse med at myggen skal sitte. Og eg synast rett og slett det høyrest best ut med vanleg mikrofon, seier ho.

Under fyrste akt delte Jeki mikrofon med nokon andre, medan ho i andre akt hadde mikrofonen heilt for seg sjølv. Ho brukte også trådlaus mikrofon på det siste nummeret «Fame».

Både Eirik og Jeki hadde ein fast mikrofon under begge aktene, som gjorde at lydmannen kunne justere deira stemme individuelt frå dei andre når dei syng.

Tekst: Amalie Haugland Bjørkedal

Biletgalleri: Orkestergrava

Orkesteret utgjorde ein stor del av årets musikal. Det har alltid vore live orkester på Volda vgs sine musikalar, men i år har dei vore meir synlege enn ved tidlegare musikalar. Somme av dei har de likevel ikkje sett, då dei har vore skjult bak filmlerreta. Her kan de derimot sjå mesteparten av dei 15 musikarane i aksjon.

Tekst: Eline Korsnes Sundal, Stephanie Dimmen og Anette Vågane Sunnarvik
Foto: Eline Korsnes Sundal og Stephanie Dimmen

– Det er godt, men også veldig trist!

Korøving
Hildur Sandstad Dalen hadde ansvar for koret og alle songarar under musikalen «Be Our Guest».

«Fantastisk, rørande og takknemleg», seier kordirigent Hildur Sandstad Dalen om årets musikal.

Musikaleventyret er over for denne gong. I fleire veker har musikklærarar og elevar jobba dagar, ettermiddagar og kanskje netter. Det er med andre ord mykje jobbing bak for å få i mål eit slikt prosjekt. Men ein kan seie at jubileumsmusikalen «Be Our Guest» har blitt ein stor suksess.

I Ørsta vart det selt ut to førestillingar, i Fosnavåg var det fullt hus torsdag kveld, og det same i Ulsteinvik på tysdag.

Hildur Sandstad Dalen er ein av dei som har hatt ein stort ansvar under årets musikal. Ho har hatt dirigentansvaret saman med Sissel Marie Frøyland. I tillegg til dette har dei to hatt ansvaret for alle solistar under musikalen saman med Yngvil Birkeland, Gunnar Aurdal og Ragnhild Engeset.

– Det har vore kjempekjekt, utfordrande og gjevande å ha denne rolla, seier Hildur Sandstad Dalen.

Hildur har ei veldig blanda kjensle over at dei er ferdige for i år.

– Det er godt å vere ferdig, men samtidig er det veldig trist. Spesielt trist for tredjeklassingane, fordi det er siste gongen deira.

Hildur Sandstad Dalen -Vi tar det ein gong til. Hysj, ein, to, tre.
Hildur Sandstad Dalen: -Vi tar det ein gong til. Hysj, ein, to, tre.

Det Hildur kjem til å hugse best frå årets musikal er alle dei store nummera.

– Det er rett og slett så sjukt bra. Nokre aktørar synast eg er så profesjonelle på det dei gjer, seier dirigenten. Ho fortel også at ho kjem til å hugse årets musikal fordi ho har hatt eit så stort ansvar ho aldri har hatt før.

– Eg kan ikkje plukke ut eit høgdepunkt for årets musikal, for alt er eit høgdepunkt i seg sjølv.

Hildur har vore med på alle dei 18 musikalane som har vore og seier at dette utan tvil har vore ein av dei beste.

– Det har vore ein av dei beste, men det ha vore veldig mykje arbeid bak. Det har blitt mykje skifting av klede, sidan det er utdrag frå alle musikalane som har vore. Det er skifting av roller og måten å syngje på. I år det også koreografi i koret og det likar eg svært godt.

Tidspresset fortel Hildur har vore den største utfordringa under musikalen.

– Ein må ta avgjerder veldig raskt. Vi skulle hatt betre tid til å tenkje i gjennom ting, fordi vi må tenkje veldig klart og kjapt.

Alt i alt meiner Hildur det har vore kjekt å vore på turné.

– Det har vore interessant. Det har vore veldig fint og kjekt, men sjølvsagt krev det litt meir. Eg likar at frå premiera og til siste førestilling blir strekt ut. Det er ikkje berre plutselig ferdig, slik som det brukar å vere når vi er berre i Ørsta. Eg likar godt at vi har fått «kvilt» litt annankvar dag og vi får vere i det heile litt lenger!

Tekst: Amalie Haugland Bjørkedal

Biletgalleri: Digitale kulisser

Mange har vore involvert i arbeidet med alt som har blitt projisert på lerreta, og det har skjedd fleire endringar og utbetringar undervegs. Nedanfor kan du sjå eit biletgalleri med det som vart dei endelege digitale kulissene.

[Klikk for større bilete/starte slideshow]

Av Håvard Krøvel-Velle