Volda-elevane innfridde forventningane nok ein gong, denne gongen ytterst i havgapet.
Det var fullsett sal og stormande jubel i Fosnavåg konserthus torsdag. Der var ei forventningsfull stemning i salen då musikkelevane entra scena for siste gong på turnéen. Høgdepunkta kom som perler på ei snor, og elevane innfridde forventningane gjennom heile kvelden.
På slutten av førestillinga fekk elevane ståande applaus frå publikum, og der var ei ekstatisk stemning i salen. Ordførar Arnulf Goksøyr siterte programleiar Ivar Hustadnes Muren på at du veit det er ein god musikalen når du føler den treff deg i hjarte.
– Dette traff iallfall meg i hjarte, og eg reknar med at det traff alle i salen også, sa ordføraren.
Han takka og overrekte blomar til prosjektansvarleg på musikklinja, Kjetil Eiksund.
Sceneteppet vart lukka, og mange av musikkelevane tok til tårene fordi turnéen har kome til vegs ende. Dette viser at dei er både glade og slitne etter mange veker med øving.
Ole-Martin Iversen, elev i 2mu, spelte Tony i Westside Story i jubileumsførestillinga.
Han syns det er trist at ”musikalen” er over for i år, men syns det har vore nokre kjekke veker. Favorittnummeret hans i år var ”One day more” frå Les Misérables.
– Det er vemodig, men eg veit eg får vere med i musikalen igjen neste år. No er eg veldig sliten!
Fleire bilete og videoar frå avsluttingskvelden kjem seinare, så følg med oss. Lik gjerne Facebook-sida vår, som kjem til å bli oppdatert med stoff også i dagane framover.
Tekst: Julie Sævik